Quiroga inicia as 'Lembranzas da Feira do Viño' coa presentación dunha revista
![quiroga revista lembranza feira viño](https://ribeirasacraxa.com/wp-content/uploads/2021/03/quiroga-revista-lembranza-feira-vino.jpg)
Na revista, que se enviará ás casas de todos os veciños de Quiroga, repásanse os 40 anos de historia da feira, que xa tivo que suspender a celebración do pasado ano por mor da pandemia. Para o alcalde, Julio Álvarez, a Feira do Viño "crea historia dentro dos eventos lúdicos e traspasa fronteiras" polo que "non se pode esquecer un evento tan importante a nivel cultural, social e económico para o municipio".
Coa presentación deste luns daba comeza a celebración da parte "cultural e lúdica" da Feira do Viño, quedando a "parte festiva" para os vindeiros días 24 e 25 de xullo, se as condicións sanitarias o permiten. Se non é posible, dixo o rexedor quirogués, a lembranza desta data importante para o municipio "servirá de ponte para a celebración do vindeiro ano".
EXPOSICIÓNS E MÚSICA
A exposición 'O fin do Camiño' organizada pola asociación Egeria e patrocinada polo programa 'O teu Xacobeo', a andaina Xeoparque Montañas do Courel, a entrega dos premios do concurso de debuxo infantil 'Feira do Viño', e diferentes espectáculos musicais completan o programa de actividades en lembranza dunha feira que cada ano se viña convertendo en excelente escaparate da produción vitivinícola da Ribeira Sacra.
![quiroga presentación revista lembranza feira viño](https://ribeirasacraxa.com/wp-content/uploads/thumbs/2021/03/quiroga-presentacion-revista-lembranza-feira-vino-200x104.jpg)