Quiroga impulsa o proxecto 'Tecendo memorias' para recuperar a identidade comunitaria
A Área de Cultura da Vicepresidencia da Deputación de Lugo asinou un convenio co Concello de Quiroga, a través da súa concellería de Servizos Sociais, para desenvolver o programa 'Tecendo memorias'.
Trátase dun proxecto destinado á recuperación da memoria comunitaria e cultural, que busca promover a socialización mediante a posta en valor da historia do territorio e das experiencias vitais das persoas que habitan nas parroquias do municipio.
O obxectivo principal destes talleres é revitalizar a cultura popular e as historias de vida que reforzan a identidade local, ademais de reactivar e estimular a memoria colectiva, comunitaria e popular, favorecendo así a participación cidadá. Serán tamén un espazo de encontro entre veciños do rural que permitirá preservar costumes e coñecementos, compartindo tradicións, experiencias e saberes.
As sesións están pensadas, ademais, para mellorar as capacidades cognitivas das persoas participantes a partir da lembranza das súas vivencias, xogos, costumes, toponimia ou expresións tradicionais como ditos, refráns, cantigas ou música popular.
Os obradoiros desenvolveranse entre setembro e novembro en tres localizacións: o Centro Social de Quiroga, o da Ermida e o de Campos de Vila. No caso de Quiroga, serán todos os luns de 18:00 a 20:00 horas, cun acto de presentación previsto para o 1 de setembro ás seis da tarde, momento no que tamén se abrirá o prazo de inscricións para comezar coas clases o día 8.
Na Ermida, as sesións celebraranse os mércores no mesmo horario, cunha presentación e inscrición o 3 de setembro ás 18:00 horas, e inicio das clases o día 10. Finalmente, en Campos de Vila, o obradoiro terá lugar os xoves, tamén de 18:00 a 20:00 horas, coa presentación o 4 de setembro e o comezo o día 11.