Quiroga celebra a 11ª San Silvestre Solidaria o 31 de decembro
O Concello de Quiroga organiza un ano máis a tradicional San Silvestre Solidaria, que terá lugar o mércores 31 de decembro ás 12:00 horas. A proba, cun percorrido urbano de aproximadamente 3,5 quilómetros e dificultade moi baixa, convida a participar correndo ou andando polas rúas do municipio.
A saída realizarase desde a Praza Rúa Lago, e as inscricións poderán facerse no mesmo lugar de 11:00 a 12:00 horas, entregando como requisito 2 quilos de alimentos non perecedeiros. Estes alimentos serán destinados ás familias do Concello, promovendo así o carácter solidario da iniciativa.
Como novidade, e ao igual que o ano pasado, antes da saída realizaranse as tradicionais “prebadaladas”, onde todos os participantes recibirán unhas gominolas para recibir o 2025 12 horas antes.
A San Silvestre é unha proba non competitiva, sen clasificación nin trofeos, deseñada para que todos poidan gozar do deporte e da diversión. Ademais, entregarase un accesorio especial para celebrar a chegada do 2024 a cada participante.
Entre os momentos máis agardados está a entrega dunha cesta de Nadal ao mellor disfrazado, así como o sorteo de catro cestas de Nadal entre todos os participantes.
O Concello anima a despedir o ano 2025 facendo deporte e pasándoo en grande nesta cita solidaria e festiva.