Quiroga avanza na loita contra a violencia de xénero
A Mesa Local contra a Violencia de Xénero reuniuse esta pasada semana na Casa do Concello de Quiroga para facer unha avaliación da situación actual na comarca neste ámbito. A xuntanza contou con representantes dos tres concellos da comarca de Quiroga, dos centros educativos, da Garda Civil, incluíndo membros da unidade VioGén de Monforte, do centro médico, dos servizos sociais municipais e do Centro de Información á Muller. Tamén participaron o alcalde de Quiroga, José Luis Rivera, e María Luisa Castro Rodríguez, responsable da Unidade contra a Violencia sobre a Muller da Subdelegación do Goberno en Lugo.
Durante a reunión analizáronse os casos activos de violencia de xénero na comarca, actualizáronse os recursos dispoñibles e reforzouse a cooperación entre os distintos organismos. Os asistentes achegaron propostas e ideas para mellorar a prevención e a atención ás vítimas.
Entre os puntos tratados destacou a renovación do Pacto de Estado contra a Violencia de Xénero para o ano 2025. Este novo marco amplía as medidas do acordo de 2017 e introduce novos eixos de actuación, como a violencia vicaria, económica e dixital. Ademais, afonda noutras formas de violencia xa recollidas no pacto anterior, como a violencia sexual ou a trata con fins de explotación sexual, facendo especial fincapé na situación das mulleres do ámbito rural e das mulleres con discapacidade.
A Mesa Local, creada en 2015 e con reunións anuais, ten como obxectivo avaliar os datos da comarca, mellorar a coordinación entre os distintos axentes implicados e valorar a efectividade das accións desenvolvidas. A pesar de que se destacou a boa coordinación existente, os participantes comprometeron un esforzo conxunto aínda maior, tendo como punto de referencia o Centro de Información á Muller do Concello de Quiroga.