Quiroga aprobou en Xunta de Goberno continuar adherido ao convenio cos GES
![quiroga ges](https://ribeirasacraxa.com/wp-content/uploads/2022/01/quiroga-ges.jpg)
O Concello de Quiroga aprobou este venres, en Xunta de Goberno, adherirse ao Convenio de Colaboración subscrito entre a Xunta de Galicia, a Federación Galega de Municipios e Provincias e as Deputacións Provinciais da Coruña e Lugo, en materia de emerxencias e prevención e defensa contra incendios forestais, para o desenvolvemento dos grupos de emerxencia supramunicipais (GES).
Segundo este convenio, Xunta e Deputación acordan apoiar a función dos GES que ven a complementar a atención das emerxencias e extinción de incendios forestais xunto cos parques de bombeiros, de forma que cubrirán zonas desprovistas de servizos de emerxencias nun ámbito de actuación superior á municipal.
O Concello de Quiroga únese a este convenio coa intención de prestar un servizo público á cidadanía que de seguridade en lugares públicos en materia de protección civil e extinción de incendios.
Os GES de Quiroga, que se enmarcan na zona de Quiroga – Terra de Lemos contarán cunha sede no municipio quirogués con seis efectivos - ao igual que ata o de agora -, posto que é unha base compartida con outros seis efectivos con sede no Courel.
Este servizo, segundo o convenio asinado, estará financiado nun 52´5 % a través da Xunta de Galicia, nun 40 % a través da Deputación provincial e nun 7´5 % con cargo ao propio concello.