Quiroga acolle a exposición itinerante do Ano Xubilar Romano 2025
A exposición itinerante sobre o Ano Xubilar Romano 2025, patrocinada pola Xunta, pode visitarse ata este venres na Casa da Cultura de Quiroga. A mostra está composta por dez paneis, vitrinas e outras pezas que achegan ao público o contido da bula ‘Spes non confundit’ e diversos elementos vinculados á tradición cristiá dos xubileos, coñecida en Galicia sobre todo pola súa versión compostelá.
O director territorial da Consellería de Cultura, Lingua e Xuventude, Manuel Antonio Fernández, visitou a exposición xunto a Jesús Río, párroco do santuario da Ermida de Quiroga e responsable da preparación da mostra; ao alcalde de Quiroga, José Luis Rivera; e a representantes da Diócese de Lugo, entre outros. O proxecto conta tamén co apoio da Secretaría Xeral da Lingua pola súa contribución á promoción do uso do galego en ámbitos sociais de especial relevancia, como o relixioso.
A exposición poderá visitarse en Quiroga ata o venres 29 de agosto, en horario de 8.00 a 14.00 horas, e posteriormente continuará a súa itinerancia por distintos puntos de Galicia ata a clausura do Ano Xubilar, prevista para o 6 de xaneiro de 2026.
Na provincia, a mostra pasou xa pola igrexa de Santa María da Fonsagrada e pola de Santa María Madanela das Nogais. A seguinte parada será na igrexa de San Xoán de Becerreá, onde permanecerá do 9 ao 20 de setembro.