Paula Vázquez presentará o seu proxecto A Libraría de Proencia na Pobra do Brollón
O Concello da Pobra do Brollón continúa programando charlas para dar a coñecer propostas interesantes de arraigamento no rural, especialmente da Ribeira Sacra ou da contorna.
Este xoves estará Paula Vázquez para contar o seu proxecto de A Libraría de Proencia, localizado na parroquia de Proendos, concello de Sober. Ademais, na actividade degustarase un doce típico do lugar, o doce de carrola.
A Libraría de Proencia preséntase non só coma libraría; tamén como tenda de agasallos e recordos da zona, así como lugar para eventos culturais e turísticos. A súa impulsora, Paula Vázquez, defende que “dende unha aldea, calquera parroquia rural galega, podemos ofrecer servizos culturais similares ao que adoitamos atopar só na cidade”.
A charla será este xoves 31 ás 20:15 na Casa da Cultura ‘Olga Novo’. O acceso é libre, preferiblemente con reserva, no teléfono 650 624 828.