Os reis visitarán este xoves as zonas afectadas pola vaga de incendios
Os reis de España, Felipe VI e Letizia, desprazaranse o vindeiro xoves a Galicia para coñecer de primeira man os estragos provocados pola vaga de incendios que, dende hai dúas semanas, devasta boa parte do territorio e que xa arrasou máis de 88.000 hectáreas, a maioría delas na provincia de Ourense, que continúa en nivel 2 de emerxencia.
Segundo informou a Casa Real, o obxectivo da visita é interesarse polas necesidades da veciñanza afectada e amosar o seu agradecemento aos equipos que traballan na loita contra o lume. Porén, a axenda non concreta aínda os lugares exactos aos que se desprazarán os monarcas.
A viaxe a Galicia forma parte dun percorrido polos territorios máis afectados polos incendios deste verán. O mércores, Felipe VI e Letizia estarán en Castela e León, onde visitarán o Parque Natural Lago de Sanabria e as serras Segundera e de Porto (Zamora), así como o Parque das Médulas (León). O venres será a quenda de Estremadura.
Pola súa banda, a raíña Sofía impulsou, a través da Fundación que leva o seu nome, a creación dun fondo de emerxencia para colaborar na recuperación ambiental e social das zonas afectadas polos incendios en España.
Este fondo, dotado inicialmente con 50.000 euros, centrarase nun primeiro momento en actuacións de reforestación na provincia de Ourense. Ademais da recuperación da masa forestal, as achegas servirán para atender a fauna afectada e apoiar outras iniciativas de restauración ecolóxica, con especial atención a aqueles danos que non adoitan estar cubertos por seguros nin polos fondos de emerxencia das administracións.