Os nenos e nenas do campamento de verán de Quiroga recibiron esta semana a visita do Oso Caroso
Os nenos e nenas que participan nos campamentos de verán organizados polo Concello de Quiroga recibiron esta semana a visita do Oso Caroso, un contacontos narrado por Paula Carrera, de Outonía, co acompañamento musical da Fundación Legar.
Esta sesión forma parte do programa de actividades impulsado pola área de Educación, Infancia e Igualdade, dentro do plan de conciliación familiar e laboral “Concilia Quiroga”. Ademais de contos como o do Oso Caroso, os campamentos inclúen deportes semanais no patio e no ximnasio do CEIP de Quiroga, xunto con dinámicas grupais puntuais como a desta xornada.
O conto relata a chegada do primeiro oso á Serra do Courel despois de moitos anos sen presenza desta especie na zona, unha forma de achegar aos máis pequenos á natureza e á fauna local.