Os nenos do Campamento de Verán de Quiroga coñeceron de preto o proceso de elaboración do mel
Os máis pequenos dos campamentos de verán Concilia Quiroga participaron esta semana na actividade “A arte é moi doce”. A xornada comezou cun breve percorrido polos murais da vila, guiado polo técnico de turismo, que explicou o significado e contexto destas obras.
A proposta forma parte do programa de actividades complementarias deste proxecto de conciliación, que inclúe dinámicas grupais e deportivas en días puntuais, organizadas desde a área de Igualdade do Concello de Quiroga e cofinanciadas a través do Plan Corresponsables da Xunta de Galicia e o propio consistorio.
Tras o paseo, chegou o momento máis doce da actividade. No Museo Etnográfico, a empresa A Varrosa Mel amosou aos nenos o proceso de elaboración do mel, un dos produtos destacados do municipio, e ofreceu unha degustación para pechar a xornada.