Os desfiles infantís deron comezo ao Entroido de 2025 en Quiroga
Os nenos e nenas do CEIP de Quiroga deron comezo ao Entroido 2025 na vila durante a xornada deste venres cando, acompañados dos seus mestres, desfilaron desde o centro educativo ao longo da rúa principal da vila cos seus disfraces, dedicados a catro dos produtos máis importantes do municipio:, mel, viño, castañas e aceite.
Os alumnos e alumnas, xunto cos traballadores e traballadoras do centro animaron as rúas ao ritmo da música, dando inicio oficial ás celebracións.
O entroido continúa en Quiroga este domingo, 2 de marzo, co concurso de comparsas, que arrancará ás 17.00 horas. Como xa é tradición, o desfile percorrerá a rúa Real ata as inmediacións da Casa Consistorial, onde dará comezo un animado baile a cargo da charanga Os Caliqueños. Haberá, ademais, unha chocolatada.
O luns,3 de marzo, terá lugar unha festa infantil para os máis cativos da casa no salón multiusos do centro social, a partir das 17.00 horas. Todos os nenos e nenas que asistan estarán convidados a merendar e a bailar coa música en directo do DJ local Michel.
O martes, continúa a festa no centro social de Quiroga onde, a partir das 17.00 horas, haberá chocolatada e orellas para todos os socios e socias que acudan polas instalacións.