Os campamentos de voleibol da Federación Galega volven a Quiroga
Quiroga acollerá un ano máis o Campamento de Voleibol Galego organizado pola Federación Galega de Voleibol, destinado a xogadores e xogadoras nados entre 2009 e 2013 e de todos os niveis de experiencia.
O programa combina adestramentos específicos con actividades pensadas para mellorar as habilidades técnicas, tácticas, físicas e sociais dos participantes. Ademais das sesións diarias de voleibol, os asistentes poderán participar en competicións internas e actividades de lecer, como sendeirismo e deportes acuáticos.
Nesta cuarta edición, o campamento desenvolverase en tres quendas: do 19 ao 26 de xullo, do 26 de xullo ao 2 de agosto e do 2 ao 9 de agosto. O prezo base por quenda é de 560 euros, aínda que grazas ás xestións da área de Deportes, os rapaces e rapazas de Quiroga poden participar sen obrigatoriedade de aloxamento, reducindo o custo a 250 euros.
As inscricións permanecen abertas ata o 30 de xuño. Para formalizar a praza, é necesario cubrir o formulario de rexistro e enviar o comprobante de pago ao correo dtecnico@volei.gal, onde tamén se atenderán calquera dúbida sobre o campamento.