Actualidade

A partir das 17:30 horas, na Praza de España, terá lugar a concentración de Compadres e daranse a coñecer os gañadores do concurso.

Este xoves 20 de febreiro, o Concello de Monforte inicia as actividades programadas arredor do Entroido 2025 coa celebración do Xoves de Compadres.

Para esta edición de 2025, o Equipo de Goberno decidiu incrementar a partida de premios en 4.000 euros, alcanzando un total de 25.000 euros, o que supón un 19% máis que en 2024 e un 39% máis que en 2023. “O obxectivo é animar á xente a que participe nestes concursos e contribúa ao éxito do noso Entroido”, salienta o alcalde, José Tomé Roca.

Trátase da maior partida económica destinada polo Goberno de José Tomé para os premios dos diferentes concursos do Entroido. “Incrementamos os importes en todas as categorías, especialmente os premios ás Carrozas e ás Comparsas do Martes de Entroido”, subliña o rexedor monfortino, quen anima “a todos os monfortinos e monfortinas a participar nos diferentes concursos de Entroido que convocamos”.

Concurso do Xoves de Compadres

Para o concurso do Xoves de Compadres, a Concellería de Cultura de Monforte organizou tres convocatorias: unha para os centros de ensino, outra para parroquias, barrios e rúas do Concello, e unha terceira de carácter individual, que concursará na Praza de España o propio xoves día 1.

Os criterios do xurado para determinar os gañadores terán en conta a orixinalidade dos materiais empregados, a montaxe, a elaboración, o interese etnográfico e a crítica social. Cada un destes criterios terá unha valoración mínima do 10% e máxima do 25% da puntuación total.

Os premios para cada unha das convocatorias son os seguintes, cunha partida máxima de 2.000 euros:

Individuais:

• 1º premio: 100 euros
• 2º premio: 75 euros
• Accésit: 50 euros

Colectivos:

• 1º premio: 150 euros
• 2º premio: 120 euros
• Accésit: 75 euros

Outros premios:

• Premio á etnografía: 150 euros
• Premio á crítica social: 150 euros

Este xoves 20 de febreiro celebrarase o concurso de Compadres nas distintas categorías descritas. A partir das 17:30 horas, na Praza de España de Monforte, terá lugar a concentración de Compadres, a comunicación dos gañadores e gañadoras do concurso e a queima dos monecos do Compadre oficial.