O Xeoparque Montañas do Courel presenta o programa de actividades para os próximos meses
O Xeoparque Montañas do Courel deu a coñecer o seu calendario de actividades para a primavera e o verán de 2026, con propostas que combinan natureza, patrimonio e cultura local, pensadas para todos os públicos.
As actividades comezarán os días 14 e 15 de marzo coa Mostra do Aceite de Quiroga, e continuarán durante a Semana Santa co XeoBús de Semana Santa, un programa temático que percorrerá distintos espazos do geoparque, cunha serie de rutas: “Auga e Xeo na contorna de A Seara e Vieiros”, o día 30 de marzo; “Xeoloxía, Aceite e Viño no Val do Sil”, o 31; “Aldeas Paleozoicas e Xeomiradoiros de Quiroga e Ribas de Sil”, o 1 de abril; “O Ouro no Norte do Xeoparque”, o 2 de abril; e “A Devesa da Rogueira: o Bosque de Bosques”, o 3 de abril.
En abril, os días 4 e 5, celebrarase a Feira do Viño de Quiroga, tamén organizada polo Concello de Quiroga, un evento centrado na promoción dos viños da zona. Para continuar, do 24 de maio ao 7 de xuño, terá lugar a Semana dos Xeoparques Europeos, unha iniciativa que combina formación e actividades de descubrimento. O 24 de maio ofrecerase unha iniciación á espeleoloxía na Cova da Ceza, mentres que o 29 celebrarase a sexta edición de Xeopícaros. O 30 de maio realizaranse visitas ás microrreservas de orquídeas, e o 31 de maio explorarase os ríos en pedra do geoparque mediante un bautismo de Xeobarranquismo.
O programa de xuño terá como actividade principal a Festa da Cereixa, o Viño e o Aceite en Ribas de Sil, que se celebrará os días 6 e 7. Ademais, o 7 de xuño terá lugar tamén a II Xeorruta dos Océanos Paleozoicos.
Xa en xullo, o 4, os visitantes poderán participar na Xeorruta Sorpresa, unha actividade que promete descubrir espazos descoñecidos do geoparque.
Todas as actividades están organizadas polo Xeoparque Montañas do Courel, co apoio da Deputación de Lugo e da Xunta de Galicia, así como dos concellos implicados.