O Xeoparque Montañas do Courel acolleu as XLII Xornadas Científicas da Sedeck
Este fin de semana, o Xeoparque Montañas do Courel foi escenario das XLII Xornadas Científicas da Sociedad Española de Espeleoloxía e Ciencias do Karst (Sedeck), coincidindo coa celebración do Día Internacional da Xeodiversidade 2025.
A inauguración correu a cargo do concelleiro de Medio Rural e Medio Ambiente, Luis Manuel Arias, e do presidente do Xeoparque, Roberto Castro, que deron a benvida aos participantes. Policarp Garay Martín, presidente de Sedeck, destacou que era a primeira vez que estas xornadas se celebraban en Galicia e mostrou a súa satisfacción por poder desenvolvelas no Xeoparque.
As actividades comezaron o venres cunha visita ao centro de interpretación da minería aurífera de San Clodio, mentres que o sábado trasladáronse á Casa da Cultura de Quiroga, onde se realizaron diversas ponencias sobre investigacións locais. Entre os temas tratados estiveron a paleobioloxía de osos pardos e cavernarios, os achados sobre Neandertais e Homo sapiens na cova Eirós, a fauna de morcegos nas covas galegas e a comunicación subterránea en alta frecuencia. Ademais, durante a xornada abordáronse estudos sobre pseudokarst e covas en rochas plutónicas, así como a cartografía e caracterización do paleokarst do Val das Mouras, concluíndo a xornada cunha visita ao museo xeolóxico de Quiroga.
As xornadas remataron o domingo con dúas saídas de campo nas que os participantes puideron visitar a cova do Ceza e o centro de interpretación das covas de Meiraos, así como o exokarst Val das Mouras.