O xacemento romano de Proendos, en Sober, acolleu unha visita guiada con gran éxito de participación

Os visitantes tiveron a oportunidade de coñecer de primeira man a historia deste lugar e os traballos arqueolóxicos que se realizan nel

O xacemento romano de Proendos, en Sober, acolleu este xoves unha visita guiada ás escavacións arqueolóxicas que se desenvolven no lugar, e que resultou ser todo un éxito. Os asistentes puideron coñecer de primeira man a historia do xacemento, a súa importancia na Galicia romana e os distintos achados que permiten comprender a evolución do asentamento ao longo dos séculos.

O horreum de Proendos, datado no século I, descubriuse tras prospeccións realizadas con georradar en 2019, que permitiron identificar estruturas subterráneas próximas á igrexa parroquial. Desde 2020, as escavacións puxeron ao descuberto este granario e outras construcións de distintas épocas, que inclúen muros prerromanos e un silo medieval do século V ou VI.