O voceiro de Esperta Monforte eleva novas demandas ao Pleno de Monforte
No pleno do Concello de Monforte de Lemos do día 24 de xullo de 2025, o concelleiro Jaime Germán Vázquez Pérez, en calidade de voceiro do grupo municipal Esperta Monforte, presentou dúas iniciativas que recollen demandas veciñais e cuestións sobre o uso de fondos públicos.
Nun dos seus rogos, Vázquez solicitou o arranxo inmediato do tramo inicial da rúa Ramón Cabanillas, debido ao seu deterioro. Ademais, pediu que se inste á empresa Aqualia a realizar unha nova limpeza da lagoa do Parque dos Condes, utilizando os mesmos medios cos que o Concello levou a cabo a intervención do pasado 16 de xuño, cuxo custo foi duns 5.000 euros.
No apartado de preguntas, o voceiro de Esperta Monforte cuestionou o motivo polo que o Concello destinou 5.000 € á entidade España Creativa para a organización do Encontro Nacional de Emprendedores Creativos —tamén denominado Semente Ribeira Sacra— e, ao mesmo tempo, non ofrece apoio económico directo ao proxecto local Semente Ribeira Sacra. Solicitou aclaracións sobre cal é exactamente a diferenza entre este evento nacional e o proxecto promovido dentro da propia Ribeira Sacra.