O turismo en Chantada creceu no mes de xuño con 528 visitantes
A Oficina Municipal de Turismo do Concello de Chantada rexistrou un notable ascenso de visitantes durante o pasado mes de xuño. En concreto, pasaron polas súas instalacións 528 persoas, un 31,6% máis respecto ás mesmas datas do 2024.
Mantense así o incremento de viaxeiros, que se vén dando nos últimos anos. Visitantes que se achegan a Chantada atraídos polo emblemático casco histórico e o paseo fluvial da vila, as igrexas románicas, a paisaxe da ribeira ou a do Monte Faro. Nestes dous últimos casos cóntase agora co atractivo engadido de ser lugares estratéxicos para a observación do ceo nocturno e convirte a Chantada en Municipio Starlight.
Ao aumento de visitantes en xuño hai que engadir os bos datos acadados durante o Salón Turístico Turexpo Galicia, que se celebrou en Silleda do 5 ao 8 de xuño. Nesta feira internacional o Concello de Chantada centrouse na promoción dalgunhas das citas máis senlleiras que acolle como o Folión de Carros, declarada Festa de Interese Turístico de Galicia desde o ano 2002 e Ben de Interese Cultural desde o 2019 ou o Entroido Ribeirao, xunto a outros atractivos turísticos do municipio. Un total de 201 persoas visitaron o stand solicitando información.
A Oficina de Turismo de Chantada sela tamén as credenciais do Camiño de Inverno e o ano pasado rexistrara no verán un incremento do 77%, con 346 credenciais seladas. As previsións son que este verán sigan aumentando os peregrinos e os visitantes que chegan a Chantada e utilizan os servizos da Oficina de Turismo.