O turismo crece de forma xeneralizada en Quiroga
O Concello de Quiroga fixo balance dos datos turísticos correspondentes ao 2025, un exercicio no que se rexistrou un incremento xeneralizado de visitantes nos principais recursos do municipio. Segundo o reconto municipal, o ano pasado deixou cifras que desde o Concello califican de “espectaculares” en comparación con exercicios anteriores, tanto nos museos como na afluencia global de turistas.
Un dos datos máis destacados é o aumento de visitas ao Museo Etnográfico, que recibiu preto dun milleiro máis de persoas que en 2024, ao pasar de 2.873 a 3.794 visitantes. No conxunto dos museos municipais —Etnográfico e Xeolóxico— rozáronse as 7.500 visitas durante o ano, mentres que desde a súa apertura superan amplamente as 71.000. A estas cifras súmase o Centro de Interpretación da Música de Raíz da Fundación Legar, que no seu primeiro ano de funcionamento rexistrou arredor de 2.000 visitas.
O balance municipal tamén subliña o posicionamento do mes de outubro como o terceiro período con maior afluencia turística, só por detrás de xullo e agosto. Este dato reforza o atractivo do outono nas montañas quiroguesas e no Xeoparque Montañas do Courel, que se consolida como un dos principais reclamos para os visitantes.
A Oficina de Turismo atendeu a preto de 5.000 persoas ao longo de 2025, maioritariamente procedentes de Galicia, aínda que tamén con presenza destacada de visitantes de Madrid, Barcelona, Valencia e Euskadi, ademais doutros puntos do Estado e do estranxeiro. A información máis demandada estivo relacionada coa natureza, as rutas de sendeirismo e o Camiño de Inverno.
Máis alá dos rexistros de museos e oficinas turísticas, o Concello destaca os datos do Instituto Nacional de Estatística (INE), que miden o turismo interno interprovincial a través da posición dos teléfonos móbiles. Segundo estas cifras, entre xaneiro e setembro de 2025 contabilizáronse 31.050 persoas en Quiroga. Aínda que aínda non se publicaron os datos do último trimestre do ano, as estimacións municipais apuntan a que se superará amplamente a cifra de 41.508 visitantes rexistrada en 2024.
Con estes datos e unha poboación próxima aos 3.000 habitantes, desde o Concello afirman que “Quiroga está de moda” como destino do interior de Galicia. A súa ubicación como porta de entrada á Ribeira Sacra, a súa pertenza ao Xeoparque Montañas do Courel, a súa inclusión no Camiño de Inverno a Santiago —con 2.758 peregrinos contabilizados en 2025—, xunto con festas de Interese Turístico, rutas homologadas e unha ampla programación cultural, gastronómica e deportiva, reforzan o seu atractivo turístico.
O impacto desta proxección tamén se reflicte no ámbito dixital. Durante 2025, a páxina web municipal rexistrou 57.623 visitas, mentres que o Facebook do Xeoparque Montañas do Courel superou o millón de visualizacións e o perfil do Concello de Quiroga alcanzou preto de tres millóns.
Ante este balance, os responsables das áreas de Cultura e Turismo, José Luis Rivera e Vicente Parra, expresaron a súa satisfacción pola evolución positiva do sector e sinalaron que o Concello continuará a traballar para potenciar os recursos existentes e dárlle a coñecer a un maior número de visitantes.