O servizo de recollida de lixo de Monforte altera os seus horarios habituais os días 24 e 31
![concello monforte](https://ribeirasacraxa.com/wp-content/uploads/2021/02/concello-monforte.jpg)
Durante os días de Noiteboa e Fin de Ano haberá cambios no servizo de recollida de lixo no Concello de Monforte. O obxectivo é o de permitirlle aos traballadores da empresa FCC, concesionaria da recollida, que poidan desfrutar desas datas festivas tan especiais.
En primeiro lugar, cómpre destacar o 23 e 30 de decembro, os traballadores non retirarán das rúas os cubos habilitados diariamente para a recollida de lixo. Esas dúas xornadas si se realizará a recollida de lixo, pero os cubos quedarán depositados na rúa ata o inicio da recollida dos días posteriores, o día de Noiteboa (día 24) e Fin de Ano (día 31 de decembro), co obxectivo de axilizar as tarefas de recollida os mencionados días.
Os días 24 e 31 de decembro a recollida comezará ás 15 horas e rematará ás 19 horas. Este horario de recollida afectará tanto ó servizo de recollida de fracción resto coma ó servizo de recollida de cartón porta a porta no casco urbano de Monforte. Deste xeito, procederase tanto á recollida de lixo como á recollida de cubos.
Por outra parte, os días 25 e 31 de decembro e o 6 de xaneiro a empresa de recollida de lixo realizará os servizos propios e habituais de domingos e festivos.
A Concellería de Medio Ambiente lamenta as molestias que puideran derivarse deste cambio e, ó mesmo tempo, pídese a colaboración de todos os veciños e veciñas, así como dos comerciantes. Do mesmo xeito, prégase ós usuarios que se absteñan de depositar o lixo en ditos días fóra do horario establecido para elo, antes das 15.00 horas.
O servizo de recollida de lixo volverá ó seu horario habitual os días seguintes destas datas festivas.