O 'roadshow' do Instituto Nacional de Ciberseguridade de España chega a Monforte
O roadshow do Instituto Nacional de Ciberseguridade de España (INCIBE) chegará a Monforte de Lemos entre os días 11 e 15 de novembro. O camión despregable do INCIBE, dependente do Ministerio para a Transformación Dixital e da Función Pública, instalarase na explanada da Compañía e ofrecerá actividades formativas e lúdicas dirixidas a todos os públicos, co obxectivo de elevar a formación e a capacitación da cidadanía en ciberseguridade e confianza dixital.
O espazo poderá visitarse de martes a venres, de 9:00 a 14:00 e de 16:30 a 19:30 horas, e o sábado, de 11:00 a 15:00 e de 16:00 a 20:00 horas. A entrada será gratuíta. En colaboración co Concello de Monforte, tamén se organizarán visitas para os centros educativos da cidade, co fin de que o alumnado poida ampliar os seus coñecementos nesta materia, considerada un dos principais retos da sociedade actual.
O roadshow contará con dúas zonas, unha interior e outra exterior, nas que se desenvolverán actividades de concienciación, formación e entretemento, como un escape room de ciberseguridade e xogos en liña.
Segundo explica o Concello, esta iniciativa busca elevar a cultura en materia de ciberseguridade que calquera usuario debe posuír para desenvolverse con confianza e seguridade na era dixital. Por este motivo, o fomento da cultura da ciberseguridade converteuse nun dos eixos centrais de actuación do Goberno de España.
Unha vez despregado, o camión convértese nun espazo multifuncional e accesible, cunha zona interior con capacidade para 30 persoas que inclúe unha área de gamificación con xogos en liña, zona de charlas e contidos didácticos, ademais dun escape room orientado á xestión de riscos dixitais. No exterior, con capacidade para 36 persoas, habilitarase unha zona de xogos e unha cabina de contacto co servizo “A túa Axuda en Ciberseguridade” (017).
Esta acción forma parte do programa #ExperienciaINCIBE, un conxunto de iniciativas itinerantes que percorren España co obxectivo de sensibilizar, concienciar, educar e divulgar a ciberseguridade entre todos os usuarios. Ademais do roadshow, o instituto dispón do stand INCIBE, deseñado para todos os públicos e que inclúe desafíos e xogos interactivos como a aplicación CyberScouts, onde menores e adultos poden poñer a proba os seus coñecementos en materia de seguridade dixital.