O Quiroga Trail Challenge adapta o seu percorrido tras os incendios
A XII edición do Quiroga Trail Challenge (QTC) celebrarase en febreiro de 2026 cun deseño renovado dos seus percorridos, condicionado polos graves incendios forestais que este verán afectaron a boa parte do municipio. A organización decidiu recuperar as Montañas do Lor como eixo principal da proba, xa que, aínda que tamén sufriron o lume, presentan un mellor estado que outras zonas do leste do concello.
O director do evento, Blas Rodríguez, explica que a prioridade foi garantir a seguridade dos corredores e respectar o proceso de rexeneración do monte: “Resulta do todo inviable utilizar percorridos que pasen por zonas queimadas pola propia seguridade dos corredores e tamén pola recuperación do chan; aínda así, o que non dubidamos en ningún momento é en celebrar igualmente a proba porque agora resulta máis necesario ca nunca”.
Cos novos trazados practicamente definidos, o calendario inverterá a orde habitual. O sábado 28 de febreiro estará centrado na serra do Lor, con propostas para todos os niveis: probas ultras e maratón de 67, 55 e 42 quilómetros, percorridos intermedios de 35 e 29 quilómetros e as opcións máis curtas de 17 e 9 quilómetros. O domingo a actividade trasladarase ao entorno do “Castelo”, nas áreas non afectadas polo lume, con distancias de 25, 17 e 10 quilómetros. Os andaríns tamén terán cabida ese día con percorridos de 17 ou 10 quilómetros.
A organización mantén a posibilidade de participar nun único día ou nas dúas xornadas. As inscricións abriranse o 13 de outubro ás 20.00 horas, momento no que se darán a coñecer os percorridos exactos de cada modalidade. O reto, sinalan desde a dirección, é conservar o espírito do QTC e que a edición de 2026 siga sendo “a festa do trail galego”.