O programa ‘Descubrir Quiroga 2025’ deu comezo cunha ruta polo Camiño do Inverno
A Concellería de Turismo de Quiroga, en colaboración coa Deputación de Lugo, iniciou este fin de semana o programa ‘Descubrir Quiroga 2025’ cunha ruta de case 20 quilómetros polo Camiño do Inverno, que une Os Albaredos con Quiroga.
Esta iniciativa busca atraer turismo e consolidar a Quiroga como un destino destacado na Ribeira Sacra e no Xeoparque Montañas do Courel.
Nesta primeira ruta participaron veciños e autoridades locais, entre eles o concelleiro de Turismo, Vicente Parra. O percorrido combinou natureza, patrimonio e tradición, seguindo os pasos dos peregrinos polo val do Sil, atravesando soutos, ribeiras e aldeas con historia.
Durante o camiño, os participantes visitaron a igrexa de Montefurado, guiados por Marisol Tomé. Ao rematar a etapa, todos os asistentes recibiron a credencial do peregrino co primeiro selo, animándoos a continuar a ruta ata Santiago de Compostela.
O programa “Descubrir Quiroga 2025” incluirá varias rutas e prolongarase ata outubro deste ano. A presentación oficial de todas as actividades terá lugar o próximo xoves 19 de xuño.