O Programa Activa de Monforte aumenta en 88 as prazas para participar das actividades
O alcalde de Monforte, José Tomé Roca, vén de aprobar o incremento en 88 prazas do Programa Activa, destinado a reforzar un dos piares básicos do mesmo, que é o envellecemento activo.
Debido a que quedaron prazas libres en actividades como Competencias dixitais, Informática Básica, Cerámica, Manualidades, Bailes caribeños, ou Costura creativa, dende o Equipo de Goberno decidiuse abrir un prazo extraordinario, do 14 ao 18 de outubro, para ofertar ditas prazas disponibles. Logo de finalizar os prazos ordinario e extraordinario de solicitudes do programa Activa e logo de ser asignadas as prazas disponibles, observouse que había unha alta demanda nas actividades Ximnasia de mantemento e Conservando a memoria.
Debido a que estas dúas son actividades que conforman un dos piares básicos do Programa Activa, o encamiñado ao fomento do envellecemento activo, dende o Executivo de José Tomé decidiuse conformar novos grupos e aumentar o número de prazas ofertadas, co obxectivo de fomentar o mantemento da saúde física e cognitiva das persoas maiores, e de reducir significativamente a lista de espera en ambas actividades e dar así resposta á súa alta demanda.
Así, configuráronse dous novos grupos de Ximnasia de Mantemento, un con 24 prazas, que se celebrarán os luns e os mércores de 11.15 a 12,15 horas; e outro das mesmas prazas que se celebrará os martes e os xoves de 17.30 a 18.30 horas. E tamén outros dous grupos en Conservando a Memoria, un con 20 prazas, que se celebrarán os xoves de 18.00 a 19.30 horas; e outro os luns de 11:00 a 12:30 horas.
En total, son 88 prazas máis en actividades de envellecemento activo, e estes novos grupos iniciarán as clases a partir do luns 4 de novembro. Para formar os novos grupos, dende o departamento de Servizos Sociais, contactarase por teléfono ó longo destes días coas persoas que figuran nas listaxes de agarda pola orde obtida tras a finalización do proceso de adxudicación de prazas.