O primeiro festival Brindadeira de improvisación oral terá lugar o vindeiro fin de semana na Pobra do Brollón
O Concello da Pobra do Brollón lanza o primeiro festival Brindadeira, o primeiro festival de improvisación oral da parroquia de Ferreiros no que improvisadoras e músicas de toda Galicia e do País Vasco xuntaranse para celebrar a improvisación oral.
Esta iniciativa, que terá lugar o vindeiro fin de semana, 22 e 23 de xullo, xa ten o seu cartel, deseñado por Juan Pablo Veneditti, no que se inclúen todas as actividades que terán lugar nesta primeira edición, que conta coa financiación dos fondos Unión Europea-NextGenerationEU a través da subvención Territorio Cultura.
Así, o sábado comezará a xornada na Casa da Cultura Olga Novo a partir das 13.00 horas coa presentación da editorial Consonni. Xa pola tarde, ás 17.00 horas, terán lugar os obradoiros infantís e adultos de brindos aos que as persoas interesadas poden apuntarse.
Logo, ás 18.00 horas, terá lugar a mesa redonda 'REVERSO. Oralidade, tradición e feminismo', con Uxúe Alberdi e Miren Amuriza. E, ás 20.00 horas, terá lugar no escenario improvisación un brindo da man do Colectivo Erre que Erre, un bertso, con Uxúe Alberdi y Miren Amuriza, e unha regueifa, co Caruncho e Os d'Herbón.
Por última actividade do sábado, Aldaolado, High Paw e O Rabelo levarán a cabo un sincero pinchacumbias no escenario musical, para pechar a xornada.
Pola súa parte, o domingo comezará cunha ruta ás 11.00 horas por Ferreiros da man das veciñas e ás 13.00 horas será a quenda da sesión vermú con músicas de Ferreiros e Romances Guímaros.
