O presidente da Deputación de Lugo supervisa en Quiroga a zona afectada polos incendios
O presidente da Deputación de Lugo e do Consorcio Provincial de Bombeiros, José Tomé Roca, visitou este xoves Quiroga para coñecer de primeira man a situación nos terreos afectados polos incendios. No percorrido estivo acompañado polo delegado do Goberno en Galicia, Pedro Blanco Lobeiras, a subdelegada do Goberno en Lugo, Isabel Rodríguez López, e varios alcaldes e responsables municipais da Ribeira Sacra.
Tomé Roca destacou que “desde o primeiro momento traballamos de xeito coordinado e seguimos a total disposición do que se nos indica desde o Cecopi, con responsabilidade e solidariedade”. Recordou ademais que o Consorcio de Bombeiros de Lugo mobilizou efectivos, bombas nodrizas e vehículos de mando dos parques de Monforte de Lemos, Chantada, Viveiro, Vilalba, Barreiros e Sarria.
O presidente explicou que este xoves o Cecopi reorganizou os medios e pediu ao Consorcio manter unicamente un retén na base de Monforte, por se fose necesario un apoio adicional. “O Cecopi marca as necesidades en cada momento e a nosa vontade, como non pode ser doutra maneira, é a de colaborar, achegando os medios e o persoal que temos a nosa disposición para combater o lume”, subliñou.