O prazo para anotarse nos campamentos e talleres de Nadal de Chantada abrirá este luns
O Concello de Chantada abrirá o 1 de decembro o prazo de inscrición para os Campamentos e Talleres de Nadal, unha proposta dirixida a facilitar a conciliación familiar durante as festas e a ofrecer actividades de lecer para os máis pequenos.
Os Campamentos de Nadal terán lugar no Pavillón Municipal desde o 23 de decembro até o 7 de xaneiro, en horario de 10:00 a 14:00 horas. Ademais, ofrecerase un servizo de madrugadores desde as 8:00 para aquelas familias que o precisen.
As sesións realizaranse os días 22, 23, 24, 26, 29, 30 e 31 de decembro, e tamén os días 2, 5 e 7 de xaneiro. As inscricións poderán formalizarse nas oficinas de Servizos Sociais, en horario de 9:00 a 14:00 horas, entre o 1 e o 10 de decembro.
Por segundo ano consecutivo, a Concellería de Igualdade organiza os Talleres de Nadal, destinados a fomentar a creatividade e a conciliación. Impartiranse no telecentro de 11:00 a 12:30 horas, con actividades para diferentes franxas de idade: 4 a 6 anos (22 e 28), 7 a 9 anos (23 e 30) e 10 a 13 anos (24 e 31).
A oferta está limitada a 30 prazas por taller, que se cubrirán por orde de inscrición nas oficinas de Servizos Sociais a partir do 1 de decembro.
O alcalde, Manuel Lorenzo Varela, fixo un chamamento para que as persoas inscritas participen realmente nas actividades, lembrando que noutros anos houbo inscricións que finalmente non acudiron, o que dificulta a organización e o uso axeitado dos recursos.
Xunto a estas actividades, a programación de Nadal incluirá propostas culturais no Auditorio Municipal e na Biblioteca, así como a tradicional Cabalgata de Reis o 5 de xaneiro.