O PP considera “prioritario” a rehabilitación integral da N-540 Lugo – Ourense
O Partido Popular (PP) de Lugo considera “prioritario” que o Goberno do Estado realice de forma “inmediata e urxente” a rehabilitación integral da N-540, que conecta Lugo e Ourense, debido aos graves problemas de seguridade viaria que presenta e que a converten nun verdadeiro perigo para os condutores.
A petición foi defendida por Elena Candia, presidenta provincial do PP, xunto ao voceiro e deputados do Grupo Provincial, deputados autonómicos e alcaldes. A presidenta explicou que se defenderán varias iniciativas tanto no Parlamento autonómico como na Deputación de Lugo para esixir ao Goberno central que leve a cabo as obras de arranxo.
Candia lamentou que “o pouco que se fixo nesta estrada é insuficiente” e acusou ao Goberno central de mostrar un desinterese pola situación de Lugo. “O estado das infraestruturas titularidade do Estado é un claro reflexo do constante desagravio que sofre a nosa comunidade autónoma por parte do Goberno de Pedro Sánchez”, engadiu.
A presidenta do PP destacou que a N-540 é “a única conexión que temos coa Alta Velocidade ferroviaria” e recordou os continuos atrasos na finalización da autovía A-56, unha infraestrutura clave para conectar Lugo con Ourense. Mentres a súa finalización segue sen data concreta, a N-540 segue sendo a vía de referencia para os miles de vehículos que se desprazan entre ambas cidades.
Pola súa banda, o voceiro provincial do PP, Antonio Ameijide, cuestionou ao Goberno do Estado sobre o destino dos 10 millóns de euros anunciados para o arranxo da estrada. Ameijide lamentou que o único investimento real previsto para 2024 sexa inferior aos 200.000 euros e denunciou que os traballos de mantemento están parados desde xuño, cualificando esta situación como un “insulto a todos os lucenses”.
O voceiro popular insistiu na urxencia de acometer un arranxo integral da N-540, afirmando que o plan de rehabilitación anunciado o ano pasado polo Goberno de Pedro Sánchez foi "electoralista e insuficiente". “Precisamos o arranxo integral e inmediato desta vía, non un plan a máis de tres anos”, subliñou.
Ameijide tamén criticou ao Goberno central por non ter en conta o plan de reforma da estrada proposto polo Executivo de Mariano Rajoy, que incluía unha inversión de 20 millóns de euros. “Os socialistas da provincia miran cara outro lado”, asegurou.
A deputada autonómica Katy Varela tamén fixo fincapé na importancia desta estrada para a vertebración da provincia, xa que comunica vilas como Guntín, Portomarín, Taboada, Chantada ou Carballedo. Varela destacou o alto volume de tráfico de turismos e camións que sofre a vía, e lamentou o mal estado das infraestruturas, que provoca danos en vehículos e accidentes, sobre todo en días de mal tempo.
"Son innumerables as fochancas que se atopen ao longo do trazado, causando graves problemas para os condutores. A situación é insostible e precisa dunha actuación inmediata", concluiu Varela.
O PP de Lugo continuará a traballar para que o Goberno do Estado atenda estas demandas e mellore a seguridade na N-540, unha das vías de comunicación máis importantes da provincia.