O PP acusa ao Goberno central de falta de compromiso coa ampliación do polígono de Reboredo
“O Goberno de Sánchez non se compromete coa ampliación do polígono industrial do Reboredo, en Monforte de Lemos, e, ademais, corrixe ao alcalde, ao Delegado do Goberno e á responsable de Suelo Empresarial del Atlántico (SEA)”.
Esta é a conclusión dos senadores do PP lucense, José Manuel Barreiro, José Manuel Balseiro e Juan Serrano, á resposta oficial do Executivo ás preguntas formuladas de oficialmente na Cámara Alta atendendo a petición do PP de Monforte, interesado por coñecer o estado do proxecto de ampliación do polígono industrial, á vista de que o anuncio do rexedor socialista en setembro do 2023 non se traduciu aínda en obras concretas.
“Non hai nada do que anunciou o alcalde xunto ao Delegado do Goberno. Preguntamos pola situación actual da ampliación, a partida orzamentaria disposta e a previsión do Executivo para a execución da obra; pero non hai nada”, subliñan. Polo tanto, “o Goberno de Sánchez contradí oficialmente o anuncio de Tomé, Blanco e Sestayo”.
Ante as preguntas dos populares, o Goberno de España apunta que a Confederación Hidrográfico do Miño-Sil ten subscrito un convenio co Concello para a mellora do saneamento e depuración do polígono, pero nada sobre a súa ampliación.
O Partido Popular insiste na necesidade de buscar unha alternativa para cubrir a demanda de solo empresarial e a que poida producirse no futuro próximo. “A dispoñibilidade de solo industrial e a prezos accesibles é fundamental para o desenvolvemento dun territorio, a implantación de proxectos empresariais e a xeración de postos de traballo que permitan fixar poboación”, sentencian.
Os senadores engaden que “non se comprometen coa ampliación do polígono industrial e, ademais, están a bloquear os accesos ao solo empresarial que ten Monforte de Lemos no Porto Seco”.