O Pavillón Municipal de Chantada acollerá un curso de Defensa Persoal dirixido a mulleres
O vindeiro domingo, 18 de maio, Chantada acollerá un Curso de Defensa Persoal Feminina, que se desenvolverá no Pavillón Municipal en horario 10.00 a 14.00 horas e de 16.00 a 20.00 horas.
Este tipo de formación conta cunha parte teórica e outra práctica. Na primeira traballaranse conceptos psicolóxicos tanto da vítima como do agresor e farase un achegamento ó código penal. Haberá unha parte de desenvolvemento do control das 5 claves que contempla o programa: a respiración, a observación, a valoración, a estratexia e a técnica. As participantes coñecerán todo tipo de prevencións ante situacións de risco para tentar evitar un enfrontamento físico. Se non é evitable aprenderanse técnicas ante un ataque ou un agarre ao peito ou un ataque cunha arma branca.
O Concello de Chantada forma parte da Rede de Entidades Locais contra a Violencia de Xénero, o que posibilita o desenvolvemento de actividades que promoven a igualdade.
“A finalidade do curso é que a muller teña ferramentas suficientes para sentirse segura nunha situación de risco en todos os ámbitos da súa vida”, destaca a concelleira de Igualdade do Concello de Chantada, Pamela Fernández.
Poden participar mulleres de 16 anos en adiante, as menores necesitarían a correspondente autorización. As inscricións deben facerse no Edificio Multiusos de Chantada en horario de 9.00 a 14.00 horas.
Este tipo de propostas parten da Dirección Xeral de loita contra a Violencia de Xénero en colaboración coa Fegamp dentro do Pacto de Estado.