O ocio nocturno abrirá o 1 de xullo e aumentan os aforos
![verbena festa orquesta concerto](https://ribeirasacraxa.com/wp-content/uploads/2021/06/verbena-festa-orquesta-concerto.jpg)
O presidente da Xunta, Alberto Núñez Feijóo, informou hoxe, tras a nova reunión co comité clínico, as novas medidas adoptadas e que pasa por un aumento de aforos e a apertura do ocio nocturno.
Así, a partir do sábado entrará en vigor unha nova normativa que regulará os aforos. Nas terrazas este pasa a ser do 100% sempre que as mesas cumpran a distancia de seguridade. No interior manterase o tope no 50%. Ademais, permítese pedir e servir nas barras de bares e cafeterías pero non se poderá consumir.
Ademais, a partir do 1 de xullo reabre o lecer nocturno, tras o éxito das probas piloto. Así, non quedará ningunha actividade por primeira vez en moitos meses pechada completamente na comunidade.
En canto á máscara, a Xunta propón unha retirada ordenada do seu uso en exteriores. A proposta do comité clínico é eliminar a súa obrigatoriedade, salvo cando non sexa posible manter a distancia dun metro e medio entre persoas. No interior seguirá sendo imperativo o seu uso.
Como excepción, seguirá sendo obrigatoria no exterior nos concellos en situación máxima, aínda que neste momento non hai ningún en Galicia. Nas terrazas seguirá sendo necesario utilizalas en todo momento, excepto no que se está consumindo, xa que non hai distancia de máis de metro e medio entre as persoas que comparten mesa.
Entre as outras medidas adicionais figuran:
- Mantense o tope de persoas que poden reunirse nos locais de hostalería, seis en interiores e ata quince nas terrazas.
- As áreas de lecer e descanso dos centros comerciais poderán reabrir.
- Aumenta de 50 a 75% o aforo en lugares de culto, academias, centros de formación, museos, acuarios e zoológicos.
- Sobe de 25 a 50 persoas o máximo de persoas asistentes a un enterro.
- No transporte urbano vai se é posible ocupar un terzo das prazas de pé.
- Volve permitirse o contacto físico en academias de danza e establecementos de actividades deportivas.
- Desde o 5 de xuño incorpóranse de forma presencial os traballadores da Xunta que están teletraballando.
En canto á vacinación, a previsión da Xunta é que se combine o sistema mixto, de seguir coas vacinacións programadas e empezar coas citas a demanda.