O martes darán comezo os traballos de reposición do chan de caucho do parque da Compañía
O alcalde de Monforte, José Tomé Roca, informa que o vindeiro martes 4 de xuño darán comezo os traballos de reposición do chan de caucho do parque da Compañía, naquelas zonas en que este chan está máis deteriorado.
“Os traballos desenvolveranse actuando en cada unha das zonas que necesitan a substitución do chan deteriorado e non suporán o peche total do Parque, senón que se irá pechando por partes, a medida que se actúe en cada zona”, explica o Alcalde “para non prexudicar os moitos usuarios cos que conta este Parque, un dos máis utilizados da cidade, especialmente agora que volve o bo tempo”.
A previsión é que as obras de mellora duren ata o venres 7 de xuño, e que o parque poida estar plenamente operativo antes da fin de semana.
Traballos de mellora do piso de caucho
Os traballos serán asumidos e costeados pola empresa, Calfensa Proyectos, que levou a cabo a renovación do Parque, a principios de 2021, pois entran dentro da garantía constituída para tal fin.
En concreto, as actuacións consistirán na reposición da capa de cor (EPDM) do pavimento de caucho naqueles puntos onde está máis deteriorado.
En concreto, actuarase na entrada da rampla da tirolesa, en todo o chan onde se sitúa o bambán-cesta, na zona do trampolín, na zona de cor azul do xogo múltiple Dragón, así como na zona do xogo de escalada.
Tamén serán levadas a cabo pequenas correccións do chan de caucho en outros sitios puntuais do Parque onde sexa necesario actuar.
O parque infantil da Compañía foi completamente renovado e ampliado a principios do ano 2021, cun investimento de máis de 145.000 euros, sendo o seu financiamento, na súa totalidade, con fondos municipais.
A zona de xogos do Parque Infantil da Compañía conta con elementos inclusivos e adaptados (4 paneis inclusivos), dous bambáns, un saltador, 4 asentos para bambáns, unha tirolesa, que é unha das principais atraccións do parque, un xogo inclusivo múltiple, un trampolín, un xogo múltiple Dragón ou xogo inclusivo para nenos e nenas a partir dun ano.