O Faladoiro de Quiroga deste mes de marzo terá como protagonistas aos montes do Courel
O Centro Social Jesús Alfonso Parada acollerá o vindeiro mércores 25 de marzo unha nova sesión do Faladoiro, que nesta ocasión xirará arredor do mundo rural e a tradición baixo o lema “O poder evocador do Courel”.
O convidado será Jesús Alfonso Parada, investigador e divulgador orixinario de Meiraos, no municipio de Folgoso do Courel, coñecido pola súa traxectoria literaria e pictórica vinculada á etnografía, as lendas e a paisaxe desta serra lucense. A súa obra está marcada polo apego ao rural e á memoria tradicional, elementos que vertebra tanto nos seus ensaios como na súa produción poética.
Formado en Historia, Traballo Social e Animación Sociocultural, Lecer e Tempo Libre pola UNED, comezou a publicar no ano 2007 coa obra Usos, costumes e cousas do Courel. Dende entón, desenvolveu unha ampla traxectoria con tres ensaios e preto de vinte poemarios, ademais de recibir diversos recoñecementos literarios. No ámbito artístico, tamén realizou exposicións como pintor e foi distinguido por entidades como a Asociación Fonte do Milagro de Froxán.
O Faladoiro é unha iniciativa impulsada polo Concello de Quiroga a través da Concellería de Servizos Sociais e Participación Cidadá. A actividade, moderada polo concelleiro Xosé Manuel Fernández, celébrase os últimos mércores de cada mes ás 18:00 horas e está aberta á participación da veciñanza.
Este espazo busca fomentar o encontro, o intercambio de coñecemento e a participación cidadá. Tras unha breve presentación da persoa convidada, o público ten a oportunidade de intervir, formular preguntas ou compartir as súas propias experiencias.