Hoxe, ás 19.00 horas, presentarase no Salón de Actos do Pazo de San Marcos o libro Simboloxía do románico de Taboada, obra do autor Xosé Lois García, editada polo Servizo de Publicacións da área de Cultura da Vicepresidencia da Deputación de Lugo.
A deputada Iria Castro acompañará ao autor neste acto, no que García, natural de Chantada, cualificará o románico de Taboada como "un dos máis interesantes do centro de Galicia".
Durante a presentación, o autor exporá os contidos da publicación, que se centra na iconografía das igrexas románicas de Taboada, entre elas Taboada dos Freires, San Xián do Campo e Castelo, as tres con elementos característicos do obradoiro do mestre Pelaxio, ademais de Piñeira, Bembibre, Cerdeda e Bouzoa.
Esta obra afonda na riqueza histórica e simbólica do románico da comarca, ofrecendo unha visión detallada dos elementos artísticos que definen o patrimonio arquitectónico de Taboada.
