O Desfile do Entroido de Monforte contará con preto de 1.300 participantes
O vindeiro martes 4 de marzo, o Concello de Monforte celebrará o seu día grande do Entroido 2024, co Desfile e concurso de Comparsas e Disfraces do Martes de Entroido.
Finalizado o prazo de inscrición onte venres 28 de febreiro ás 14 horas, o alcalde, José Tomé informa que “son 1.275 os participantes inscritos que optarán ós premios das diferentes categorías. É a cifra de participación máis alta dos últimos anos, que unida ás boas previsións climatolóxicas auguran a celebración dun bo Martes de Entroido. En 2024 foron 1.097 as persoas inscritas, polo que en 2025 son 178 persoas máis, un 16% máis”.
No Concello de Monforte anotáronse, nas diversas categorías de comparsas, 15 colectivos, e nas categorías individuais de 1 a 3 compoñentes, 11 inscricións. De concellos de fora de Monforte, anotáronse 14 comparsas diferentes, provintes de concellos tanto da provincia de Lugo, en concreto, Sober, Sarria, O Saviñao e Pobra de Brollón, como doutros concellos de Galicia, como Nogueira de Ramuín, Ourense ou Ferrol.
Cabe recordar que para esta edición de 2024, dende o Executivo de José Tomé decidiuse incrementar a partida de premios en 4.000 euros con respecto a 2024 (21.000 euros), alcanzando os 25.000 euros, que é un 19% máis. “O obxectivo é animar á xente a que participe e contribúa ó éxito do noso Entroido” salienta o Alcalde.
Para o concurso do Martes de Entroido o Concello establece dúas modalidades, unha delas para as comparsas e disfraces de Monforte de Lemos e outra para disfraces e comparsas de fóra do municipio. No primeiro caso, destina 17.850 euros en premios, que son 2.850 euros máis que en 2024, un 19% máis. Para participantes de fora do Concello, este ano contarán con 3.150 euros en premios, 850euos máis que en 2024, un 37% máis.
O primeiro premio para as comparsas de máis de 90 compoñentes será de 1.500 euros e no caso das que sexan de fóra, con máis de 25 compoñentes, ascenderá a 600 euros. Haberá premios de 300 euros para a mellor comparsa tradicional, para a mellor posta en escena e a mellor música en vivo, mellor humor e mellor crítica de actualidade.
Concurso de Comparsas e Disfraces do Martes de Entroido
O Desfile de comparsas e disfraces do Concello de Monforte comezará o martes 4 de marzo ás 1.00 horas na praza da Estación. Percorrerá as rúas Calvo Sotelo, Roberto Baamonde, Cardeal Rodrigo de Castro e finalizará na praza da Compañía, onde a concelleira de Cultura, Marina Doutón, dará a coñecer ós ganadores e gañadoras do concurso. A xornada concluirá coa actuación da Orquestra Suavecito.
O xurado cualificará as comparsas na praza da Estación de 16:00 a 17:00 h. Os disfraces individuais concentraranse obrigatoriamente na praza da Estación ás 16:30 h, onde o xurado as identificará. Logo, tanto as comparsas como os disfraces serán cualificados por lugares indeterminados do percorrido.
Os criterios que seguirá o xurado para determinar os gañadores terán en conta a orixinalidade dos materiais empregados e tamén se vai valorar a montaxe, a elaboración e os materiais utilizados, o interese etnográfico e a crítica social. Cómpre destacar que cada un destes criterios terá unha valoración mínima do 10% e a máxima será do 25% do total da puntuación.