O Cuartel Vello de Taboada acolle esta semana dúas charlas sobre seguridade e competencias telemáticas
O Cuartel Vello de Taboada acollerá este xoves, 20 de febreiro, dúas charlas dirixidas á veciñanza nas que se abordarán temas como as competencias dixitais para acceder a trámites administrativos e seguridade ante roubos e estafas.
Concretamente, ás 10.30 horas terá lugar no Salón de Actos do Cuartel Vello unha charla titulada ‘A administración cerca de ti’, onde os asistentes poderán obter o certificado dixital e a cl@ve permanente para relacionarse telemáticamente coas administracións, ademais doutras consultas coa Tesouraría Xeral da Seguridade Social, o INSS ou o SEPE.
Xa pola tarde, ás 17.30 horas, a Garda Civil impartirá a charla ‘Plan Maior de Seguridade’, onde dará información para evitar roubos e enganos, ademais de dar consellos para conseguir espazos máis seguros.