O Courel reinventa os Cantos de Taberna para achegarse aos pobos
O Courel reinventa este 2026 os tradicionais Cantos de Taberna, transformándoos en varios eventos que se desenvolverán en distintos lugares da serra. A primeira cita será cos denominados Cantos da Montaña, que terán lugar o 18 de abril na vila de Seoane. A iniciativa busca encher de música e ambiente espazos históricos para a veciñanza, percorrendo as antigas cantinas e bares nun formato renovado.
O programa inclúe un roteiro histórico polas cantinas de Seoane, que se celebrará pola mañá ás 12:00 horas. Xa pola tarde, ás 18:00 horas, terá lugar a apertura das cantinas e o recibimento dos grupos na praza, mentres que as actuacións musicais comezarán ás 19:00 horas.
A xornada continuará ás 23:00 horas cunha proposta de petiscos para os grupos participantes e rematará á medianoite cunha foliada libre na vila, nun encontro pensado para recuperar e dinamizar a tradición musical e social da serra do Courel.