O Concello de Taboada fai pública a programación de Nadal

O Concello de Taboada organiza para este Nadal de 2024 unha decena de actividades destinadas ao público de todas as idades, que arrancaron xa este sábado co Festival da Escola de Música que tivo lugar no Auditorio do Cuartel Vello.

O programa continúa a partir deste xoves, 19 de decembro, cun obradoiro de baile que terá lugar ás 17.00 horas na Casa da Cultura. O sábado, 21 de decembro, o Concello ofrecerá uns petiscos de Nadal na Praza da Riazón entre as 11.00 e as 20.00 horas, e o domingo, 22 de decembro, o Ciclo Mestre Mateo continuará no Cuartel vello coa proxección do filme ‘Salta’.

O día 24, Papá Noel visitará a Praza de Riazón a partir das 17.00 horas, e para o día de Nadal está programada unha representación do Belén Vicente no Centro Cívico, que será ás 18.00 horas.

O 28 de decembro será a quenda de Teatro Castelao no Auditorio do Cuartel Vello, e o 29 haberá un monólogo de Alberte Montes. O día 30, A Apalpadora visitará o municipio.

Ademais destas actividades, o día 31 haberá unha festa de Fin de Ano no Centro Cívico e, o día 5, chegará a tradicional Cabalgata de Reis que percorrerá as rúas de Taboada a partir das 17.00 horas.