O Concello de Sober presenta o programa completo de actividades de Nadal
O Concello de Sober vén de presentar o programa completo das actividades de Nadal que se desenvolverán ao longo de todo o mes de decembro e rematarán o 5 de xaneiro coa esperada visita dos Reis Magos.
A axenda inclúe unha gran variedade de eventos, destacando a música e as tradicións, ademais dos certames habituais de poesía, postais, beléns e decoración de locais comerciais.
A programación comezou o 2 de decembro coa presentación do poemario do xornalista José Vicente Barcia, residente en Sober. O sábado pasado celebrouse o mercadiño de Nadal organizado pola Asociación Veciñal de Bolmente.
O 12 de decembro inaugurarase o alumeado de Nadal e os beléns, entre os que destacan o instalado no Centro Sociocultural por Ruperto Álvarez e un belén a tamaño natural con pezas de madeira realizadas por Eugenio Linares, situado diante da Casa do Concello.
O 13 de decembro, Rosende celebrará a Festa de Santa Lucía, e o día 14 a Escola Municipal de Música de Sober ofrecerá o seu Festival de Nadal. A visita de Papá Noel está prevista para o 19 de decembro, mentres que o 21 Sergio Alba presentará o seu espectáculo de humor para adultos “Dous rombos. Pasa para a cama!” no Centro Sociocultural.
O grupo Trícole protagonizará un concerto de panxoliñas o día 26 no local social de Bolmente, e o 28 ofrecerá o seu espectáculo “Os folieiros de lavadores” no Centro Sociocultural de Sober.
O 29 de decembro, o goberno local organizará unha festa infantil de Nadal no pavillón do CEIP Plurilingüe Virxe do Carme. Ao día seguinte, o 30 de decembro, Trícole cantará aos Reis no Centro Sociocultural, onde tamén se entregarán os premios dos certames de Nadal.
Xa en 2026, o 2 de xaneiro, Trícole realizará un concerto de panxoliñas que percorrerá diversos puntos do municipio, como a residencia de maiores, Canaval e Rosende.
As actividades rematarán o 5 de xaneiro coa chegada dos Reis Magos, que repartirán agasallos para todos os nenos e nenas do municipio.