O Concello de Monforte organiza a xornada formativa 'Empoderamento de mulleres para a inserción social e laboral'
O Concello de Monforte, a través da Concellería de Muller e Igualdade e do Centro de Información á Muller (CIM), organiza a celebración dunha xornada formativa titulada 'Empoderamento de mulleres para a inserción social e laboral', que servirá ademais para conmemorar o Día Internacional da Muller Rural, que se celebra este 15 de outubro e enmárcase dentro do Programa ALICIA – Activando la Igualdad.
“O obxectivo desta actividade”, destaca o alcalde, José Tomé Roca, “é mellorar a inserción laboral das mulleres de Monforte a través de itinerarios formativos personalizados para mellorar a súa empregabilidade, tanto por conta propia como allea, rompendo as barreiras sociais que obstaculizan a súa inserción en condicións de igualdade”.
Neste senso, este é un dos obxectivos do Equipo de Goberno, que todos os anos co gallo do Día internacional da Muller Rural, leva a cabo actuacións para mellorar a cualificación das mulleres do municipio e que adquiran habilidades que incrementen as súas posibilidades de acceso ao mercado laboral.
Esta actividade será impartida por Fundación Mujeres e terá unha duración 10 horas, e será gratuíta e dirixida a mulleres en situación de desemprego, e será tanto de carácter presencial como online.
O xoves 31 de outubro realizarase unha primeira sesión presencial de 9.30 a 13.30 horas no Centro Cívico Social, sobre habilidades sociolaborais para a busca de emprego na que as participantes aprenderán a potenciar as habilidades que require o mercado de traballo.
As seis horas restantes serán impartidas de xeito online, e distribuíranse en dúas sesións: unha sesión de 3 horas, 'Empregando o ordenador para a búsqueda do emprego', na que aprenderán a utilizar o ordenador e Internet de maneira práctica e aplicada á actividade da busca activa de emprego; e outra sesión tamén de 3 horas, 'Estratexias de búsqueda de emprego en internet', na que utilizarán as ferramentas que nos proporciona internet para adquirir estratexias na busca activa e eficaz de emprego.
Ademais, as participantes poderán completar a formación con obradoiros de reforzo online sobre temáticas como a entrevista de traballo, selección de persoal, etc.
As mulleres interesadas poderán realizar a súa inscrición presencialmente no CIM, no Centro Cívico Social, ou ben chamando ao número de teléfono 982 416 350. As prazas son limitadas e cubriranse por rigorosa orde de inscrición.