O CEIP Rosalía de Castro de Bóveda abre as súas portas ás familias con unha xornada informativa
O CEIP Rosalía de Castro de Bóveda celebrará o próximo 11 de marzo unha xornada de portas abertas destinada ás familias que desexen coñecer de primeira man as instalacións e o modelo educativo que desenvolve o centro.
A actividade dará comezo ás 10:30 horas e concíbese como un espazo de encontro e información para os pais e nais interesados na escolarización dos seus fillos e fillas. Durante a visita, o equipo docente explicará os principais eixos do proxecto pedagóxico, así como os servizos e recursos dispoñibles para o alumnado.
O colexio pretende facilitar o achegamento da comunidade ás súas instalacións e mostrar o funcionamento diario do centro, cunha aposta pola calidade educativa, a atención personalizada e o desenvolvemento integral do alumnado.
Para aquelas persoas que non poidan asistir na data prevista, o centro ofrece a posibilidade de concertar unha cita individualizada co equipo directivo ou docente, co fin de resolver dúbidas e proporcionar información detallada sobre a oferta educativa.
En canto ao proceso de admisión, a reserva de praza permanecerá aberta entre o 1 e o 20 de marzo. Posteriormente, o período oficial de matrícula para o curso 2026/2027 desenvolverase entre o 20 e o 30 de xuño, prazos nos que as familias deberán formalizar os trámites correspondentes para garantir a escolarización.