O Castañazo Rock lanza un concurso de bandas para participar na edición de 2026
A organización do festival Castañazo Rock Chantada acaba de anunciar a apertura do seu propio concurso de bandas, “A Liorta Musical”, unha oportunidade para que novos proxectos musicais se dean a coñecer e teñan a posibilidade de actuar na próxima edición do festival en 2026.
O concurso celebrarase o 18 de abril e estará aberto a formacións de tres estilos musicais: rock/punk/metal, músicas do mundo e música urbana. Poderán participar tanto bandas como proxectos en solitario. As inscricións xa están abertas desde o 10 de novembro de 2025 e permanecerán dispoñibles ata o 12 de xaneiro de 2026.
O conxunto gañador terá o privilexio de actuar no Castañazo Rock Chantada 2026 cun set de entre 50 e 60 minutos. A selección das formacións participantes correrá a cargo da asemblea da Asociación Cultural O Castañazo, que fará pública a lista o 2 de febreiro.