O BNG pon en marcha unha campaña para promover o consumo do comercio de proximidade no sur de Lugo
O BNG presentou este venres en Monforte de Lemos unha nova campaña centrada no fomento do consumo de produtos galegos e no apoio ao comercio de proximidade. Baixo o lema “Mellor local, mellor galego”, a iniciativa ten como obxectivo reforzar a economía próxima e concienciar á cidadanía sobre a importancia de apostar polos negocios locais.
A responsábel comarcal do BNG no sur de Lugo, Rosana Prieto, explicou que a campaña pretende fortalecer a economía de proximidade, protexer o emprego e favorecer a cohesión social nas vilas e cidades. Neste senso, subliñou a necesidade de apoiar o comercio de barrio e as pequenas e medianas empresas galegas como elementos fundamentais do tecido económico.
Desde a formación nacionalista destacan que o comercio local desempeña un papel clave na xeración de emprego estábel, na fixación de poboación e na prestación de servizos próximos e de calidade. O alcalde da Pobra do Brollón, Xosé Lois Maceda, sinalou que cada compra nestes establecementos supón “unha aposta polo futuro de Galiza, pola sustentabilidade e por un modelo económico máis xusto”.
O BNG tamén pon o foco nos beneficios medioambientais do consumo local, ao reducir desprazamentos e favorecer hábitos de consumo máis responsábeis. Ademais, resalta a capacidade do pequeno comercio para apoiar a produción galega e dinamizar rúas e prazas, manténdoas como espazos vivos de encontro social.
Con esta campaña, o BNG aposta por un modelo económico centrado nas persoas, no territorio e no ben común, e anima á cidadanía a implicarse activamente, convertendo cada decisión de compra nun apoio directo ao comercio local e ao futuro de Galicia.