O BNG demanda unha protección especial para o túnel romano de Montefurado
O deputado do Bloque Nacionalista Galego, Iago Suárez, demandou esta mañá na Comisión 6.ª Industria, Enerxía, Comercio e Turismo, unha protección especial para o túnel romano de Montefurado, unha das obras de enxeñería máis destacadas do patrimonio galego. Suárez advertiu sobre a necesidade de superar a burocracia e os prazos administrativos para garantir a preservación deste enclave histórico situado no sur de Lugo.
“Esta xoia do noso patrimonio merece unha protección especial, sen demoras nin expedientes interminables. A xente de Montefurado xa non quere escoitar falar de prazos ou sancións; o que queren saber é se a Xunta vai impedir que se reinicien as obras de extracción de lousa na zona,” afirmou Suárez durante a súa intervención.
O deputado nacionalista salientou a necesidade dunha resposta clara por parte do Goberno do PP: “A Xunta está a favor ou en contra da extracción de lousa en Montefurado? Esa é a pregunta principal. Porque se a Xunta non se opón claramente, a empresa promotora poderá conseguir os permisos e retomar a actividade mineira, con todas as consecuencias que isto terá para o territorio.”
Iago Suárez tamén denunciou que a actividade extractiva xa se está producindo na zona, segundo puido comprobar nunha visita recente: “No mes de outubro estiven no túnel e alí había máquinas traballando. A preocupación da veciñanza é enorme, e a Xunta non pode permanecer indiferente ante esta situación.”
Desde o BNG reiteran a súa demanda para que o Goberno galego adopte unha posición firme e defenda o patrimonio cultural de Montefurado fronte a intereses privados que poñen en risco a súa conservación.