O barrio monfortino de Carude celebra esta fin de semana as súas festas
As festas de San Lázaro, no barrio monfortino de Carude, regresan esta fin de semana cunha extensa programación que comezará o venres, 4 de abril, cunha Pancetada popular e a actuación dos Festicultores Troupe.
O sábado, as celebracións comezarán cunha sesión vermú con degustación de ovos de San Lázaro e a actuación do dúo D’Caché, que repetirá pola noite. Os nenos e nenas serán os protagonistas da sesión de tarde, con xogos infantís. A verbena arrancará ás 23:00 horas coa actuación da orquestra Saudade, que poñerá o broche de ouro á xornada do sábado.
O domingo, 6 de abril, Batukada Tukupara abrirá a xornada cun pasarrúas polo barrio. Ás 12:30 será a misa solemne e a venda de roscas benditas. Posteriormente, comezará a sesión vermú, amenizada polo dúo Cacharada, que tamén pechará as festas cunha actuación ás 20:00 horas. Pola tarde, ás 17:00 horas, terá lugar o Festival Creativa, con actuacións de baile urbano, música e exposición de pinturas. Durante a festa haberá a tradicional degustación de ovos de San Lázaro.
Cortes de tráfico
Dende o Concello informan de que, con motivo das celebracións, dende este mesmo mércores día 2 de abril e ata o día 6, produciranse cortes de tráfico nas rúas do barrio. Así, a rúa Sober e a entrada a A Pinguela estarán pechadas dende hoxe ás 15:00 horas e ata o 6 de abril ás 20:00 horas.
Pola súa banda, a praza de Carude estará tamén pechada entre esta tarde e o 6 de abril. Ademais, durante os eventos na praza cortarase o Paseo de Lugo á altura de Duquesa de Alba para desviar o tráfico por esta última, así como na entrada da rúa de Carude. Permitirase a entrada a residentes en Aceña Nova en sentido contrario ao habitual e non se permitirá o paso de vehículos á praza durante as celebracións, polo que esta rúa será provisionalmente de dobre sentido de circulación.
Ademais, con motivo da colocación de atraccións na entrada de A Pinguela e na zona de estacionamento que hai ao final da rúa Carude, o servizo de entrada e saída de A Pinguela farase pola zona de estacionamento que hai ao pasar as pistas de tenis, pola nova zona acondicionada ao lado do edificio da Confederación Hidrográfica.