O alumnado do CEIP de Quiroga enche a vila de música coas tradicionais saídas de Reis
O alumnado do CEIP de Quiroga leva toda a semana celebrando as tradicionais saídas pola vila para cantar os Reis, unha iniciativa que cada ano enche as rúas de música e Panxoliñas e que conta coa participación de todos os cursos do centro.
As actuacións comezaron o martes, cando o alumnado de 4º A e 2º de Primaria realizou as súas interpretacións na praza da Rúa Lago e na praza Maior. O mércores foi a quenda dos nenos e nenas de 4º B e Infantil A, que levaron as súas cancións á praza da Rúa Lago e á praza de España. O venres, 12 de decembro, o alumnado de 6º e 1º de Primaria continuou co programa de interpretacións, cun percorrido musical que pasou pola praza da Rúa Lago e pola praza do Toural.
A actividade continuará este luns 15 de decembro, co alumnado de 3º de Primaria e Infantil B, que encherá de música a praza da Rúa Lago e a praza de España, tamén ás doce do mediodía.
Por último, o martes 16 de decembro, pecharán esta edición o alumnado de 5º de Primaria e Infantil C, que despedirá as saídas musicais coas súas actuacións na praza da Rúa Lago e na praza do Toural.