Monforte puxo fin á primeira parte da IV edición do Ciclo de Concertos de Grupos Monfortinos cun gran éxito de participación
Os concertos programados durante o mes de agosto dentro da IV Edición do Ciclo de Concertos de Grupos Monfortinos chegaron ao seu fin o pasado mércores, día 20, coa estelar actuación de El Mundo de Sofía Band e Segunda Parte na Praza da Estación. Este ciclo forma parte do programa do Verán Cultural do Concello de Monforte e ofreceu aos veciños e visitantes a oportunidade de disfrutar dun variado repertorio musical interpretado por artistas locais.
A programación de agosto comezou o luns 18 coa actuación dos grupos Cero2Cero e Malenne na Praza da Compañía, continuou o martes 19 cos concertos de Cool Flanders e Dinosaurios na Praza de España, e finalizou o mércores 20 coa presenza de El Mundo de Sofía Band e Segunda Parte na Praza da Estación. A alta participación do público, destacan dende o Concello, evidenciou a boa acollida desta iniciativa, que xa se consolidou como un dos piares do verán cultural da cidade.
O ciclo, no que participan 12 grupos monfortinos, inclúe actuacións nas Prazas da Compañía, de España e da Estación, e retomarase os días 1, 2 e 3 de setembro, cando outros seis grupos locais, entre eles Deloreans, Los Jinetes del Trópico, Nectarine Soul, Deuce, Galga Blues Band e Bella Chaos, pecharán esta edición do ciclo.
Segundo o alcalde, José Tomé Roca, este ciclo é “unha aposta firme do Concello de Monforte polos grupos monfortinos, para dar a coñecer a súa creatividade e as súas propostas en diferentes estilos musicais tanto ós nosos veciños como ás persoas que nos visitan”. Ademais, engadiu: “En definitiva, o noso obxectivo é poñer en valor ós grupos musicais da cidade, incluíndoos no Programa do Verán Cultural, e dándolles así o recoñecemento que merecen”.
O Concello subliña que, grazas ao éxito acadado, este ciclo non só proporciona visibilidade aos grupos locais, senón que tamén fomentou a creación de novos proxectos musicais na cidade, consolidando a cultura local como un dos eixos centrais do verán monfortino.