Monforte organiza unhas xornadas dirixidas ás familias
O Concello de Monforte porá en marcha a semana que ven, as Xornadas en formación e sensibilización en corresponsabilidade e coidados Familia e crianza: superando estereotipos, dirixida ás familias monfortinas con fillos ou fillas entre 0 e 6 anos.
Con esta formación, dende a Concellería da Muller e Igualdade, a través do CIM preténdese iniciar o camiño para sensibilizar ás familias sobre a necesidade de fomentar a corresponsabilidade nas tarefas de crianza e nos usos do tempo dos coidados.
Así mesmo, nestas xornadas traballarase para remover os estereotipos dentro das parellas e conseguir unha repartición equilibrada das tarefas domésticas e mellorar así a conciliación da vida familiar, laboral e persoal, libre de condicionamentos de xénero, xa que son as mulleres as que, de forma maioritaria, asumen no noso país a carga de coidados familiares e domésticos.
Desenvolveranse dúas sesións grupais de formación, unha cos pais (homes) e a seguinte cos dous proxenitores. Estas sesións irán dirixidas ás familias con fillos ou fillas entre 0 e 6 anos.
As sesións realizaranse en cada un dos centros de ensino de educación primaria, así como na Escola Infantil Municipal, comezando o próximo venres 28 de outubro, no centro educativo PP. Escolapios de 15.30 a 17.30 horas e posteriormente na Escola Infantil Municipal de 18.00 a 20.00 horas.
Cada sesión formativa consistirá nunha exposición dos contidos invitando as persoas participantes a dar as súas opinións e experiencias persoais para exemplificar as distintas situacións. Haberá unha enquisa previa en formato dixital para compartir coas familias antes das sesións formativas.
Entre os contidos destas xornadas abranguerase o desenvolvemento psíquico e emocional infantil, falarase sobre os tipos de apego, o papel necesario do pai e da nai no primeiro ano de vida do bebé (necesidades emocionais do puerperio) e tratarase o tema dos estereotipos e roles de xénero).
As persoas interesadas en asistir poden inscribirse no seu propio colexio de Primaria ou a través do CIM no 982 416350. A actividade está organizada polo Concello de Monforte e financiada pola Secretaría Xeral de Igualdade, en desenvolvemento do Plan Corresponsables.
