Monforte conmemora a Xornada Europea da Cultura Xudía con visitas guiadas polo barrio xudeu
O Concello de Monforte celebrará o vindeiro domingo 7 de setembro a Xornada Europea da Cultura Xudía cunha proposta que inclúe dúas visitas comentadas pola zona de ámbito xudeu da cidade. As rutas sairán diante da Oficina de Turismo, situada na rúa do Comercio número 6, e terán lugar ás 11:30 e ás 18:00 horas.
A actividade forma parte do programa do Verán Cultural impulsado polo equipo de goberno municipal e será conducida polo investigador monfortino Felipe Aira. As visitas, que teñen carácter gratuíto, prolongaranse durante aproximadamente unha hora e media.
Monforte de Lemos integra, xunto con outras vinte localidades españolas, a Asociación da Red de Juderías de España-Caminos de Sefarad, un distintivo que pon en valor o seu rico pasado medieval e, en particular, a pegada da comunidade hebrea na cidade. A pertenza a esta rede permite promover iniciativas orientadas á difusión do patrimonio histórico e artístico local.
A edición deste ano da Xornada Europea da Cultura Xudía está promovida pola Asociación Europea para a Preservación e Promoción da Cultura e o Patrimonio Xudeus e desenvólvese baixo o lema “o pobo do libro”.
A proposta pretende transmitir a idea de que cada persoa é un libro e que, en conxunto, conformamos unha biblioteca viva. A metáfora subliña a forma en que se conserva a tradición xudía mediante a narración, o estudo e o diálogo, destacando a universalidade dun legado textual que pertence a todos, con independencia do idioma, da orixe ou das crenzas.