Monforte acollerá esta semana un “free tour” para fomentar o emprendemento
O vindeiro martes 30 de xullo, a partir das 10:30 horas, Monforte de Lemos acollerá un “free tour” para dar a coñecer novos negocios locais e fomentar o espírito emprendedor. Trátase dunha actividade organizada polo Club de Emprendemento, que consistirá nun percorrido a pé por varios establecementos da localidade co obxectivo de visibilizar proxectos emprendedores de recente creación e favorecer o contacto entre persoas interesadas en emprender na zona.
O punto de partida será a Praza de España, onde as persoas participantes serán recibidas baixo un gran paraugas azul, símbolo da Fundación Acción contra a Fame. Desde alí, visitarase unha selección de negocios nos que as súas promotoras compartirán as súas experiencias: os inicios, as dificultades atopadas, as motivacións para emprender e os modelos de negocio que están a desenvolver.
A maioría dos proxectos participantes foron impulsados por mulleres e forman parte do tecido emprendedor máis novo de Monforte. Ademais do percorrido, a xornada servirá como espazo para facer networking e intercambiar ideas, co fin de fortalecer a rede local de emprendemento.
Esta acción forma parte do proxecto Comunidades Rurais Sostibles Galicia, desenvolvido por Acción contra a Fame e cofinanciado polo Fondo Social Europeo Plus e a Fundación MAPFRE. O programa ofrece asesoramento, formación e apoio personalizado para impulsar a creación de emprego e o desenvolvemento económico nas zonas rurais.